Монголын уран гулгагч олимпод оролцож байна гэх мэдээ #ХУДАЛ

   [Худал] 2022 оны 02 дугаар сарын 08-ны 17:28 цагт “Морин Аяллын Хишигээ” нэртэй Twitter хэрэглэгчийн хаягаас “Монгол Улсаас өвлийн олимпод оролцож буй анхны уран гулгалтын тамирчин Г.Марал-Эрдэнэ” тайлбартай зураг жиргэснийг 23 удаа цааш түгээж, 182 лайк дарсан байв. Энэхүү монгол уран гулгагчийн зураг бүхий ижил агуулгатай пост Facebook платформд ч мөн хурдтай тархсан.

📌Уг мэдээлэлд үзүүлсэн хариу үйлдлийн 70 орчим хувь нь хуурамч мэдээлэл болохыг мэддэг, залруулахыг санал болгож байгаа нь сайшаалтай. Ийм төрлийн мэдээллийг хялбархнаар шалгаж болох жишээг оруулж байна.

✅ Агуулгаар шалгах Монгол Улсаас өвлийн олимпод оролцож байгаа тамирчдын талаар мэдээлэл түгээмэл байгаа ч албан ёсны эх сурвалжийг сонгох нь чухал. Үүний тулд Google платформд нарийвчлан хайх утгаа хашилт буюу “...” дотор бичиж, албан ёсны вэбсайтаас хайх бол site: гээд нэр зааж ашиглана.
✅ Зургаар шалгах Зурган дээр курсорыг аваачаад, “маус 2” товчийг дарж гарч ирсэн цэснээс Search Google for image- ийг сонгоно. Үр дүнд нь тухайн зураг ашиглагдсан бүх илэрцийг харуулна.

#FactCheckedByMFCC

🔎 Бид дараах байдлаар баримт шалгалт хийлээ.

📌 Монголын Үндэсний Олимпын Хорооноос Бээжин 2022 өвлийн олимпод зориулан хөтөлж буй албан ёсны вэбсайт “Манай баг тамирчид” гэх танилцуулга нүүр хуудсандаа байршуулдаг бөгөөд Батмөнхийн Ачбадрах, Ариунсанаагийн Энхтуул гэсэн хоёр цанын тамирчны танилцуулга бий.

📌 ОХУ-ын Красноярск хотноо 2019 оны гуравдугаар сарын 2-12-нд болсон өвлийн 29 дүгээр Универсиад наадмын эмэгтэйчүүдийн ганцаарчилсан төрөлд уран гулгагч Г.Марал-Эрдэнэ оролцож 30 дугаар байрт жагссан. Энэ үеэр авсан гэрэл зургийг ашигласан байна.

   

Та бүхэн манай төвийн баримт нягталсан мэдээтэй холбоотой аливаа санал хүсэлт, залруулга хийлгэх болон бусад санал гомдлоо редакторын factcheck@uzeg.agency имэйл хаягаар ирүүлнэ үү.

Аливаа мэдээллийг түгээхээсээ өмнө #Эхлээдбод     #Thinkfirst