Үсэглэлийн баярын үсгийг сугалаагаар тохируулах хуулийн төсөл өргөн барилаа гэх мэдээлэл худал

Checked by: MFCC

Ерөнхий агуулга

Дашзэвэгийн Нити нэртэй фейсбүүк хэрэглэгч “Үсэглэлийн баярын үсгийг сугалаагаар тохируулах хуулийн төсөл өргөн барилаа” гэх тайлбартай, УИХ-ын дарга Г.Занданшатар болон БСШУ-ны сайд Л.Энх-Амгалан нарын зурагтай мэдээлэл түгээжээ.

Баримт шалгалтын үр дүн

УИХ-ын вэбсайтад ийм мэдээлэл байхгүй бөгөөд 2019 оны 12 дугаар сарын 12-ны өдрийн зураг ашиглажээ.

2022 оны 05 дугаар сарын 14-нд Дашзэвэгийн Нити нэртэй хэрэглэгчийн хаягаас “Үсэглэлийн баярын үсгийг сугалаагаар тохируулах хуулийн төсөл өргөн барилаа” гэх тайлбартай, УИХ-ын дарга Г.Занданшатар болон БСШУ-ны сайд Л.Энх-Амгалан нарын зурагтай пост оруулсан нь 05 дугаар сарын 17-ны байдлаар 1,000 реакц, 19 сэтгэгдэл авч, 943 удаа цааш түгээгджээ.

1. 2019 оны 12 дугаар сарын 12-ны өдрийн зураг ашигласан байна

📌Уг постод ашигласан зураг нь өнгөрсөн парламентын үед буюу “УИХ-ын гишүүн Л.Энх-Амгалан, Ё.Баатарбилэг, Ж.Ганбаатар, Д.Оюунхорол, Б.Энх-Амгалан нарын нэр бүхий 10 гишүүн Улсын Их Хурлын сонгуулийн тухай хуулийн төслийг өнөөдөр (2019.12.02) УИХ-ын дарга Г.Занданшатарт өргөн барилаа” гэх мэдээллийн зураг байгааг google image search хийж мэдэж болно.

2. УИХ-ын вэбсайтад ийм мэдээлэл байхгүй

📌УИХ-ын Тамгын газраас эрхлэн хөтөлдөг parliament.mn албан ёсны вэбсайтад 05 дугаар сарын үйл явдлын мэдээлэл дунд БСШУ-ны сайд Л.Энх-Амгалан хуулийн төсөл өргөн барьсан тухай агуулга байхгүй байна. Мөн БСШУЯ-ны вэбсайтад ийм мэдээлэл байхгүй байна.

3. Л.Энх-Амгалан сайд залруулга хийсэн

📌05 дугаар сарын 15-нд Л.Энх-Амгалан сайд өөрийн 191 мянган дагагчтай “Энх-Амгалан Лувсанцэрэн” нэртэй албан ёсоор баталгаажуулсан цэнхэр тэмдэглэгээтэй /public figure/ хаягаар шалгаж буй мэдээллийн зургийг аваад “Монголд их тархсан фэйсбүүкийн нэг шинэ вирус гэсэн шүү. Гоё сэтгэсэн байна шд ээ. Кккк. Ирэх 7 хоногийн ажил, үйлсэд нь эрч хүч, амжилт, бүтээлийн дээдийг хүсье” гэсэн тайлбартайгаар оруулжээ.
📌Энэ агуулга нь “фэйсбүүкийн нэг шинэ вирус” гэх зүйрлэсэн үгээ хашилтад бичээгүйгээс зарим хүнд шууд утгаар нь ойлгогдож болзошгүй ч далд утгаар хуурамч мэдээлэл гэдгийг илэрхийлсэн байна.


Аливаа мэдээллийг хуваалцахаасаа өмнө #ЭхлээдБод #Think1st


Та бүхэн манай төвийн баримт нягталсан мэдээтэй холбоотой аливаа санал хүсэлт, залруулга хийлгэх болон бусад санал гомдлоо редакторын hello@mfcc.mn имэйл хаягаар ирүүлнэ үү.

Leave a Reply

Сэтгэгдэл үлдээх

Хуваалцах

Бид Олон Улсын Баримт Шалгагчдын Сүлжээ (International Fact-Checking Network)-ний ёс зүйн кодын дагуу аливаа мэдээллийг баримтаар баталгаажуулан шалгадаг. Баримтаар шалгасан мэдээллээ #ҮНЭН, #ХУДАЛ, #ТӨӨРӨГДҮҮЛСЭН, #БҮРЭН БУС, #ЭВЛҮҮЛЭГ, #ЕГӨӨДӨЛ гэсэн зургаан төрлөөр ангилж, олон нийтэд үнэн бодит мэдээлэл түгээн ажиллаж байна.

Check document