430 мянган ахмад өндөр насны тэтгэвэр авдаг гэх мэдээлэл ХУДАЛ

[Худал] Шинэ он солигдох мөчид Монгол Улсын ерөнхийлөгч иргэддээ хандан мэндчилгээ дэвшүүлэх үеэрээ өндөр насны тэтгэвэр авсан иргэдийн зээлийг нэг удаа тэглэхээр болсныг зарлаж, энэ шийдвэр ёсоор хэрэгжсэн. Тухайн үед хэвлэл мэдээллийн байгууллагуудаар цацагдаж байсан мэдээллүүдийг шүүж үзэхэд, улсын хэмжээнд, 422 мянгаас 430 мянган өндөр настан тэтгэвэрт авч байгаа тухай ikon.mn, news.mn зэрэг томоохон сайтууд мэдээлж, тэр дагуу бусад сайтуудын мэдээллийн эх сурвалж болжээ. Харин тавдугаар сарын 14-ний өдөр Нийгмийн даатгалын ерөнхий газраас танилцуулсан дөрөвдүгээр сарын статистик мэдээлэлд өндөр насны тэтгэвэр авагч иргэдийн тоо 322.9 мянга болсон хэмээжээ. Өөрөөр хэлбэл, дөрвөн сарын хугацаанд тэтгэвэр авагч өндөр настнуудын тоо 100 мянгаар буурсан гэх хачирхалтай дүгнэлт гарахаар байгаа юм. Энэ дагуу оны эхэнд цацагдаж байсан мэдээллүүд болон Нийгмийн даатгалын ерөнхий газрын мэдээллийг харьцуулан баримтыг шалгалаа.
#FactCheckedByMFCC

2020 оны нэгдүгээр сард ikon.mn сайтад нийтлэгдсэн “Тэтгэврийн зээл аваагүй 176 мянга орчим ахмадад нэг удаа тус бүр нэг сая төгрөгийн урамшуулал олгох хэрэгтэй” гэх гарчигтай мэдээллийг ашиглан баримт шалгая.

Эдгээр тоо нь нэгдүгээрт хоорондоо таарахгүй, 20 гаруй мянган ахмадын зөрүү гарч байна. Мөн тухайн үед буюу 1-р сарын 31-ний байдлаар Нийгмийн даатгалын ерөнхий газрын сайтад цацагдсан статистик мэдээллийг шалгавал, 312.8 мянган иргэн өндөр насны тэтгэвэр авсан байна. Харин өндөр насны тэтгэврээс гадна, тахир дутуугийн, тэжээгчээ алдсаны болон цэргийн тэтгэвэр авагчдийн нийлбэр нь 419.5 мянга байжээ. Эндээс тухайн үеийн мэдээллүүдэд тэтгэврийн даатгалын сангаас тэтгэвэр авдаг бүх иргэнийг өндөр настны тэтгэвэр авдаг мэтээр төөрөгдүүлсэн байдлаар мэдээлэл бэлтгэсэн гэж үзэх үндэслэлтэй байна. Тэтгэврийн даатгалын сангаас нийт 4 төрлийн тэтгэвэр олгодог бөгөөд, үүний 70 гаруй буюу дийлэнх хувийг нь өндөр насны тэтгэвэр авагчид бүрдүүлдэг юм.

Та бүхэн манай төвийн баримт нягталсан мэдээтэй холбоотой аливаа санал хүсэлт, залруулга хийлгэх болон бусад санал гомдлоо редакторын factcheck@uzeg.agency имэйл хаягаар ирүүлнэ үү.

Аливаа мэдээллийг түгээхээсээ өмнө #Эхлээдбод     #Thinkfirst